حكايه روميو وسمسمه @@خاص للمملين @@

حكايه كل شباب النهارده .. حنشوفها في شخص روميو الطالب الجامعي المتخرج من 4 سنين من صيدله السنبلاوين .. و حبيبته سمسمه, بكالوريوس هندسه قسم ( كهربه أفراح ) !




روميو تتجوزيني ؟

سمسمه ـ أفندم ؟

روميو ـ بقولك تتجوزيني ؟

سمسمه ـ !!!!!

روميو ـ تتجوزيني ؟

سمسمه ـ لا !

روميو ـ ليه ؟

سمسمه ـ بصراحة كدة شكلك مش عاجبني ..

روميو ـ إزاي يعني ؟

سمسمه ـ يعني .. أصل أنا ليا مواصفات معينة لفارس أحلامي .

روميو ـ مواصفات معينة ؟ .. هو انتي هتتجوزي عربية ؟

سمسمه ـ لا ! .. بصراحة كدة .. إنت مش فارس أحلامي اللي باتمناه !

*****


روميو ـ تتجوزيني ؟

سمسمه ـ إيه ده ؟ شكلك اتغير !

روميو ـ إيه رأيك ؟

سمسمه ـ واو .. شعرك بقة ناعم ! .. دي باروكة ؟

روميو ـ أيوة

سمسمه ـ ودي عدسات خضراء ؟

روميو ـ أيوة

سمسمه ـ واو ! .. بس بجد .. بقيت وسيم .. واو ! ده انت بقيت شبه نيكولاس كيج !

روميو ـ مين عباس كيج ده ؟

سمسمه ـ عباس ؟!! ياي .. إيه عباس دي ؟ اسمه نيكولاس ..

روميو ـ مين نيكولاس ده ؟

سمسمه ـ بقة مالكشي في السيما وجاي تكلمني ؟ .. ياي !

*****




روميو ـ تتجوزيني ؟

سمسمه ـ انت لسة ليك عين تكلمني ؟

روميو ـ أيوة .. أنا عرفت مين بنكرياس كيج ده

سمسمه ـ أولاً : اسمه نيكولاس كيج ..

روميو ـ أيوة أيوة .. كنت هاقول اسمه صح .. بس اختصرته .. ده ممثل

سمسمه ـ ممثل إيه ؟

روميو ـ ممثل أمريكاوي

سمسمه ـ أمريكاوي ؟! .. إخّييي ! .. اسمه أميريكان يا بابا .. ما تبقاش

دونكي

روميو ـ دونكي دي تبقى شتيمة ؟

سمسمه ـ أوف كورس

*****




روميو ـ تتجوزيني ؟

سمسمه ـ عندك عربية موديل كام ؟

روميو ـ موديل دي تبقى شتيمة ؟

*****




روميو ـ تتجوزيني ؟

سمسمه ـ قوللي الأول .. حاطط أنهي نغمة في الموبايل بتاعك ؟

روميو ـ نغمة دي تبقى شتيمة ؟

*****


روميو ـ تتجوزيني ؟

سمسمه ـ ما قلتليش .. إنت بتشتغل إيه ؟

روميو ـ أنا -بلا فخر- عاطل

سمسمه ـ عاطل ؟ .. ياي ! ..

روميو ـ مش أحسن من اللي ما بيشتغلش ؟

سمسمه ـ لا

روميو ـ يعني مش هتتجوزيني ؟

سمسمه ـ لا يا روميو

روميو ـ كدة أنا أزعل

سمسمه ـ ما تزعلش يا بابا .. خليك فريش

روميو ـ ماشي .. ماشي .. بس قوليلي ..

سمسمه ـ إيه ؟

روميو ـ فريش دي تبقى شتيمة ؟

*****




روميو ـ تتجوزيني ؟

سمسمه ـ لقيت شغل ؟

روميو ـ أيوة طبعًا .. سنتين وأنا بادور .. أخيرًا لقيت ..

سمسمه ـ وإيه هو ؟

روميو ـ سواق تاكسي .

سمسمه ـ ياي ! .. مش مكسوف وانت بتقولها ؟

روميو ـ فيها إيه ؟ العمل شرف .. وكلها كام سنة وأجمع مبلغ كويس ..

سمسمه ـ شرف ؟ جتك القرف !


*****

روميو ـ تتجوزيني ؟

سمسمه ـ جمعت مبلغ كويس ؟

روميو ـ طبعًا .. مبلغ كبير جدًا ..

سمسمه ـ قد إيه يعني ؟

روميو ـ ألف جنيه

سمسمه ـ نعم ؟!!! .. ألف جنيه دول تروح تسرح بيهم ببطاطا ..

روميو ـ يعني موافقة ؟

سمسمه ـ روح اتنيل .

*****




روميو ـ تتجوزيني ؟

سمسمه ـ عندك شقة ؟

روميو ـ طبعًا .. أودة على السطوح ..

سمسمه ـ نعم ؟!! ..

روميو ـ إيه المشكلة ؟! .. أحسن ما ننام في الشارع !

سمسمه ـ في الشارع ؟! .. إيه الألفاظ السوقية دي ؟! ياي ! .. لازم يا بابا تجيب

شقة .

روميو ـ طيب .. كلها كام سنة وأجيبلك أحسن شقة في الدنيا .

سمسمه ـ وهتجيبها في جاردن سيتي ولا في الزمالك ؟

روميو ـ لا .. في الأهلي .. هيهع هيهع هيهع !

*****




( بعد سنوات) :


روميوو ـ تتجوزيني ؟

سمسمه ـ جبت الشقة ؟

روميو ـ أيوة .. الحكومة بتبني شقق للشباب وأنا خدت شقة .. صحيح إنها اتأخرت

لسبع سنوات .. لكن المهم إنها جات ..

سمسمه ـ فانتاستيك

روميو ـ بس الشقة ناقصة حاجة .

سمسمه ـ إيه هي ؟

روميو ـ مفيهاش حمام !

سمسمه ـ امشي من قدامي ! .. مش طايقاك !

*****


روميو ـ تتجوزيني ؟

سمسمه ـ إنت تاني ؟

روميو ـ جبتلك حمّام إنما إيه

سمسمه ـ خليه ينفعك

روميو ـ ليه بس ؟ .. ده ينفع لينا احنا الاتنين

سمسمه ـ وأنا مالي ؟

روميو ـ مش عاجبك .. مش مشكلة .. أكتبه باسمك



*****



(بعد سنين) ..

روميو ـ هتتجوزيني ولا أولع فيكي ؟

سمسمه ـ ومالك محروق كدة ؟

روميو ـ حكايتنا طولت قوي .. طولت أكتر من اللازم

سمسمه ـ أوكي .. بس ممكن أعرف حاجة ؟

روميو ـ إيه ؟

سمسمه ـ إنت ليه متمسك بيا أوي كدة يا مزمز ؟

روميو ـ أصل .. أصل ..

سمسمه ـ أصل إيه ؟

روميو ـ أصل أنا بحُبك (بضم الحاء) !

سمسمه ـ بحُبك ؟!! .. إيه بحُبك دي ؟! .. إسمها بحِبك (بكسر الحاء) ! ..

وبعدين خليك روش وقول : I love you

روميو ـ ماشي .. بس قوليلي ..

سمسمه ـ نعم ؟

روميو ـ روش دي تبقى شتيمة ؟



*****




روميو ـ تتجوزيني ؟

سمسمه ـ بصراحة .. في حاجة كنت عاوزة أقولهالك من زمااااااان يا روميو .

روميو ـ إيه ؟

سمسمه ـ أنا بصراحة .. مش شايفة إن في حد في العالم يستاهلني

روميو ـ يا سلام ! .. ليه ؟

سمسمه ـ عشان أنا جميلة .. خفيفة الدم .. رشيقة .. رقيقة ..

روميو ـ رقيقة ؟! .. ده انت بدأتي تقشفي

سمسمه ـ فشر !

روميو ـ فوقي لنفسك .. العمر بيجري ..

سمسمه ـ أنا مصرة على رأيي

روميو ـ يعني إيه ؟

سمسمه ـ يعني اقطع معايا

روميو ـ بعد كل السنين دي ؟! .. بعد كل الحب ده ؟!!

سمسمه ـ بلاش تراجيديا من فضلك

روميو ـ ماشي .. بس قبل ما أمشي عاوز أسألك سؤال واحد بس ..

سمسمه ـ إيه هو ؟

روميو ـ تراجيديا دي تبقى شتيمة ؟

*****





( بعد سنوات ) ..



روميو ـ تتجوشيني ؟

سمسمه ـ إيه ؟

روميو ـ تتجوشييينييييييي ؟

سمسمه ـ إنت مين ؟

روميو ـ أنا حبيبك يا هبلة .. البشي النضارة عشان تشوفيني

سمسمه ـ طيب شاعدني عشان ألاقي النضارة

روميو ـ آهي على الترابيزة قدامك

سمسمه ـ فين ؟!!

روميو ـ لا دي نظارتي أنا

سمسمه ـ أيوة لقيتها ..

روميو ـ البشيها بقة

سمسمه ـ ططييبب

روميو ـ عينيكي فوق شوية يا سماسم .. ده بقك ..

سمسمه ـ طيب لبشهالي إنت

روميو ـ عقبال ما البشك الدبلة

سمسمه ـ ما تكشفنيش يا ميشو بقي .. كنت بتقول إيه بقى ؟

روميو ـ كنت بقول تتجوشششيييينيييييي ؟

سمسمه ـ أكوشك ؟ .. إزاي ؟

روميو ـ يا ولية مش تكوشيني .. تـ .. تـ .. جـ .. و.. شـ .. يـ .. نـ .. ي ؟

سمسمه دي شتيمة ؟

روميو لاااااء .. بقولك تتجوشيني ؟

سمسمه ـ آه !! .. أجوشك

روميو ـ بالضااااابط .. هاه ؟

سمسمه ـ شيبني أفكر

روميو ـ أشيبك تفكري ؟! .. ده انت هتموتي خلاش !

سمسمه ـ لا .. شيبني أفكر بش

روميو ـ ربنا يوفقك

سمسمه ـ إيه ؟

روميو ـ ربنا يوفقك

سمسمه ـ بتقول إيه ؟

روميو ـ ربنا ياخدك

*****


(على فراش الموت) :

روميو ـ تـ … كوح .. كوح .. تتـ .. كوح كاح كيح .. تتكو .. كوح .. كوح ..

تتكوشـ .. كوح كوح .. يني ؟

سمسمه ـ مش شامعة

روميو ـ بـ .. قوللـ .. كوح .. كوح .. بقولك .. تـ .. تـ .. كوح .. كوح .. تتجوشيـ .. ؟ كوح .. كوح …….

سمسمه ـ أجوش مين ؟!!!

روميو ـ هـ .. و.. ه .. كووح كوح كاح .. هوه إنتي .. كوح كوح .. معرفتيـ .. ش .. كوح كوح كيح .. ميـ .. كوح .. مين ؟!!

سمسمه ـ إيه ؟ ..

روميو ـ لا .. كوح .. أبدًا .. كوح .. كنت … كح كح .. بأكح

سمسمه ـ كنت بتكح ؟!!!! .. شلامتك .. ما قلتليش ليه ؟

روميو ـ هو .. كوح .. إنتي .. لشة .. عارفـ .. ـة .. كوح كوح

سمسمه ـ بتقول إيه ؟

روميو ـ يا .. ولية .. كوح كوح .. ردي .. كوح كوح .. عليا .. تـ .. تـ .. جو.. شيـ .. كوح كوح كوح كوح .. نـي ؟

سمسمه ـ أجوشك ؟!! .. طب بش خد الدوا الأول

روميو ـ يا وليـ .. ـة .. كوح .. كوح .. أنا .. كوح .. كوح .. هتتجوشيـ .. كوح

كوح كوح .. ـني ؟

سمسمه ـ أيوة يا حاج .. موافقة .. موافقة إنك تتكوشني ..

روميو ـ أخيـ….كوح كوح ..راااااً !! .. كوح كوح .. كدة أموت .. كوح ..

كوح .. وأنا .. كوح .. مطمئن ومرتاح .. الودااا .. كوح ..ع ع ع ع

سمسمه ـ يا حاج .. يا حاج ..

لااااااااااااااااااااااااااااا !!

وقد تم الزواج السعيد قبل موت روميو وسمسمة بساعة واحدة فقط


تحياتي
مجروح بجد

ههههههههههه جامدة اوووووى

هههههههههههه موتني ضحك ياخراشي عسل انت هههههه @زيـــــــــنــــــه

ههههههههههههههههه



حيييييييل حلوه



تقبل مروري

وميو ـ تتجوزيني ؟

سمسمه ـ إيه ده ؟ شكلك اتغير !

روميو ـ إيه رأيك ؟

سمسمه ـ واو .. شعرك بقة ناعم ! .. دي باروكة ؟

روميو ـ أيوة

سمسمه ـ ودي عدسات خضراء ؟

روميو ـ أيوة

سمسمه ـ واو ! .. بس بجد .. بقيت وسيم .. واو ! ده انت بقيت شبه نيكولاس كيج !

روميو ـ مين عباس كيج ده ؟

سمسمه ـ عباس ؟!! ياي .. إيه عباس دي ؟ اسمه نيكولاس ..

روميو ـ مين نيكولاس ده ؟

سمسمه ـ بقة مالكشي في السيما وجاي تكلمني ؟ .. ياي !